هوسات (أقمّس)

أقمّس اعويشتي بالماي اَلذ من عيشة الذلّه
واظلن حر نفس ماكون بيه اتبان أبد خلّه
هذاك الظن اطخ ابيوم روح و بالعجل گلّه

هذا آنه وماغير اطباعي

💫💫💫💫💫💫💫💫

أقمس اعويشتي بالماي واِن صحت فرد تمره
ألذ من غوزي الذله اليحط وسط الگلب يمره
العُمر ساعاته محدودات والبالذل خلص عمره

كالميّت ماعايش يومه

💫💫💫💫💫💫💫💫

أقمّس عويشتي بالماي إن صح واشكر الباري
ولاأسمح ابّيتي بيوم يدخل للغبر طاري
هذا الوكت لاميدوم وإخذ العِبَره من ساري

بَعد العِز گومه ايعوفونه

💫💫💫💫💫💫💫💫

أقمس اعويشتي بالماي ماني الطامع بغوزي
واذا قبلت تذل الروح اگلها من الدنس يوزي
روح الماتوافي وياي ماتصبر وكت عوزي

اطلعها وعالموت ارميها


عظيم ابوتوفيق الخنفري